Heimasíða > Á döfinni Byggðasafn Árnesinga hlýtur íslensku safnaverðlaunin 2002 Lýður Pálsson safnstjóri með viðurkenningarskjöldinn. Fimmtudaginn 12. september sl. voru íslensku safnaverðlaunin veitt í þriðja sinn á Höfn í Hornafirði. Dómnefnd samþykkti að veita Byggðasafni Árnesinga verðlaunin þetta árið, fyrir byggingu á þjónustuhúsnæði safnsins sem var fullfrágengið í apríl sl. Safnaverðlaunin voru nú veitt í þriðja skipti, en til þeirra var stofnað á árinu 2000 að frumkvæði Íslandsdeildar ICOM og Félags íslenskra safnamanna. Síldarminjasafnið á Siglufirði hlaut verðlaunin fyrst safna, en í fyrra fékk Fræðsludeild Listasafns Reykjavíkur verðlaunin. Markmiðið með verðlaunaveitingunni er að efla faglegan metnað íslenskra safna og hvetja þau til að kynna menningararf þjóðarinnar á framsækinn og áhugaverðan hátt. Í álitsgerð dómnefndar segir: „Dómnefnd íslensku safnaverðlaunanna samþykkti einróma að veita Byggðasafni Árnesinga íslensku safnaverðlaunin árið 2002, fyrir byggingu á þjónustuhúsnæði safnsins sem var fullfrágengið í apríl sl. Safnið hlýtur verðlaunin vegna áherslu á faglegt innra starf og framsýni sem lýsir sér í byggingu nýs þjónustuhúsnæðis. Segja má að Byggðasafn Árnesinga hafi frá upphafi glímt við aðstöðuleysi svo sem fleiri söfn í landinu gera. Árið 1995 hófst uppbyggingarskeið hjá safninu þegar opnaðar voru nýjar sýningar í Húsinu og Assistentahúsinu á Eyrarbakka. Þá höfðu bæði húsin hlotið gagngera viðgerð en eftir stóð að rými vantaði fyrir innra starf safnsins, þ.e. söfnun, varðveislu, skráningu og sýningagerð. Innra starf safnanna er grundvöllur þess sem blasir við hinum almenna safngesti. Skráning og yfirsýn starfsmanna yfir safnkostinn, traustur og öruggur aðbúnaður hans eru mikilvægustu þættir þess að safnstarfið þrífist til framtíðar. Þetta hefur verið leiðarljós forráðamanna Byggðasafns Árnesinga sem báru gæfu til þess að leysa frumþarfir stofnunarinnar með uppbyggingu hinnar glæsilegu vinnu- og þjónustuaðstöðu safnsins á Eyrarbakka. Húsið var reist á skömmum tíma en frá því að framkvæmdin var boðin út í september 2001 liðu aðeins átta mánuðir þar til verktaki afhenti húsið fullbúið 19. apríl. Staðsetning þess í þorpinu á afmarkaðri lóð utan sjálfs safnsvæðisins er prýðileg. Vinnustaða fyrir starfsmenn safnsins er mjög góð og vinnan við að koma safngripunum í framtíðarhúsnæði er spennandi verkefni. Það væri fengur fyrir safnastarfsemi á Íslandi ef fleiri söfn ættu þess kost að tryggja starfsemi sína og varðveislu muna með svipuðum hætti og aðstandendur Byggðasafns Árnesinga á Eyrarbakka hafa búið sínu safni.“ Heimild: Fréttavefur Suðurlands
		Höfundarréttur © Byggðasafn Árnesinga · Hönnun: Vefur.is